VV zyrtarizon kandidaturën e Alban Hysenit për një mandat të dytë në Gjilan

Lëvizja Vetëvendosje ka zyrtarizuar kandidimin e kryetarit aktual të Komunës së Gjilanit, Alban Hyseni, për një mandat të dytë në zgjedhjet lokale të ardhshme.

Gjatë një konference për media, të mbajtur në Gjilan, kandidatura e Hysenit u konfirmua publikisht nga vetë ai dhe nga kryeministri i Kosovës, Albin Kurti.

Të dy shprehën mirënjohje për mbështetjen e qytetarëve dhe theksuan të arriturat gjatë mandatit të kaluar.

“Dua të falënderoj qeverisjen tonë lokale në Gjilan për aq shumë punë të mira që ka bërë dhe për të arriturat e saj, për qytetarët e Gjilanit pa dallim. Bëhet fjalë për një qeverisje gjithëpërfshirëse,” deklaroi Kurti, duke përmendur investimet e bëra në sektorë të ndryshëm në komunë.

Nga ana e tij, kryetari Alban Hyseni falënderoi kryeministrin për përkrahjen institucionale ndaj Anamoravës, veçanërisht në projektet infrastrukturore dhe zhvillimore që janë realizuar gjatë këtyre viteve.

Vetëvendosje synon të ruajë qeverisjen në Gjilan, duke u mbështetur në punët e deritanishme dhe projektet e nisura për të ardhmen.