Ish-gjyqtari i Gjykatës Kushtetuese i jep drejtë Kurtit për seancën konstituive

Ish-gjyqtari i Gjykatës Kushtetuese, Kadri Kryeziu, ka reaguar lidhur me debatet që kanë shpërthyer pas votimit për verifikimin e mandateve të deputetëve dhe qëndrimin e Kryeministrit në detyrë, Albin Kurti.

Në një prononcim për media, Kryeziu tha se Kurti është kryeministër legal, por për shkak të rrethanave të krijuara, ai mund të mos konsiderohet legjitim nga ana e kundërshtarëve politikë. Megjithatë, ai sqaroi se sipas Kushtetutës, Kurti ka të drejtë dhe detyrë të vazhdojë ushtrimin e funksionit të kryeministrit deri në formimin e qeverisë së re.

“Debatet janë politike, por Kushtetuta është e qartë. Qeveria e deritanishme mbetet në detyrë derisa të formohet tjetra, pavarësisht votimeve apo qëndrimeve të partive opozitare. Ky është një standard demokratik që duhet respektuar”, tha Kryeziu.

Deklaratat e tij janë parë si një mbështetje e qartë për qëndrimin e Lëvizjes Vetëvendosje, që ka insistuar se nuk ka shkelje ligjore dhe se përkundrazi, opozita ka tentuar ta paraqesë si krizë kushtetuese një proces normal parlamentar.

Ky qëndrim i një ish-gjyqtari të Kushtetueses pritet të shuajë shumë nga debatet e ndezura që kanë përfshirë skenën politike të vendit.