“Kosova dhe Metohija” nga Prokuroria e Speciales, Çitaku: Fyerje e poshtërim, duhet reagim institucional

Vlora Çitaku, nënkryetare e Partisë Demokratike të Kosovës, ka bërë një reagim pasi që termi “Kosova dhe Metohija” është përdorur nga Prokuroria e Gjykatës Speciale.

Rreth kësaj ajo ka thënë se diçka e tillë s’ka ndodh si gabim e as rastësi, por se, përdorimi i këtij termi nga kjo Prokurori, është i motivuar politikisht dhe është fyerje e rëndë për qytetarët e Kosovës.

‘‘Përdorimi i termit “Kosova dhe Metohija” nga ana e Prokurorisë së Gjykatës Speciale nuk është lapsus, as gabim i rastësishëm. Është një akt i qëllimshëm, i motivuar politikisht, që përbën jo vetëm një fyerje të rëndë për qytetarët e Republikës së Kosovës, por edhe sfidim i institucioneve dhe shtetit tonë.

Ky është një poshtërim. Testim i dinjitetit tonë si shoqëri, institucione, si shtet.

Të gjitha institucionet e Kosovës duhet reaguar urgjentisht dhe seriozisht.

Heshtja sot është aprovim nesër. Dhe nëse heshtim tani, historia nuk do të na falë’’, ka shkruar ajo.