“Trump i paparashikueshëm”, vjen thirrja për Kosovën: Të shmangen konfrontimet, SHBA nuk ka paragjykime ndaj shqiptarëve

Raportet e Kosovës me Shtetet e Bashkuara të Amerikës, shpesh kanë qenë në qendër të diskutimeve, marrë parasysh që SHBA është aleati kryesor dhe më i rëndësishim i Kosovës.

E në lidhje me pozicionimin që duhet të kenë liderët dhe politikanët e Kosovës në raport me Donald Trump, në një bashkëbisedim me “Bota sot” ka folur Agim Aliçkajn, drejtor ekzekutiv i Ligës Qytetare Shqiptaro-Amerikane.

Si fillim, tha se liderët duhet të jenë të kujdesshëm dhe se konfrontimet me Trump apo përfaqësuesit tjerë amerikanë, duhet të shmangen me çdo kusht.

“Liderët dhe politikanët e Republikës së Kosovës duhen të jenë shumë të kujdesshëm në raport me Presidentin Trump. Ai është i paparashikueshëm, inatçor dhe i pëlqejnë lavdërimet, falënderimet dhe mirënjohjet. Konfrontimet publike me të, por edhe me të gjithë përfaqësuesit amerikanë duhen të shmangen me çdo kusht. Bashkëpunimi, shkëmbimi i mendimeve dhe përvojave, konsultimi dhe koordinimi me amerikanët është rruga e drejtë e suksesit”.

Po ashtu, Aliçkaj përmendi edhe ndihmën që SHBA ka dhënë për kombin shqiptar, në veçanti Kosovën dhe ekzistencën e saj.

ImageAgim Aliçkajn, drejtor ekzekutiv i Ligës Qytetare Shqiptaro-Amerikane.Foto galeri
“Vetëm populli shqiptar i ndihmuar nga Amerika e garanton ekzistencën e Kosovës dhe të mbarë kombit.

Kjo nuk do të thotë nënshtrim dhe pranim të pakusht të të gjitha veprimeve dhe propozimeve që vijnë nga Amerika. Ata i kanë interesat e veta taktike që nganjëherë, për çfarëdo arsye, nuk përputhen plotësisht me ato të Kosovës dhe të kombit shqiptar. Në mbledhje të mbyllura, ata duhet të shikohen në sy dhe të ballafaqohen me argumente bazuar në fakte”, deklaroi drejtori i LQSHA.

Gjithashtu, ai kërkoi që me SHBA-në të punohet dhe bashkëpunohet në vazhdimësi.

Në këtë pikë, u shpreh i befasur me nivelin e bashkëpunimit ndërmjet forcave politike, veçanërisht qasjen e partive opozitare.

“Amerika nuk ka paragjykime ndaj shqiptarëve siç kanë disa vende evropiane. Me Amerikën duhet të punohet pandërprerë. Ajo të dëgjon dhe pret që ti të dish çka kërkon, që ti vetë të punosh me përkushtim për ta arritur atë, dmth. ta kryesh pjesën tënde dhe ta bindësh për mbështetje të drejtë dhe reale.

Këtu rëndësi të veçantë ka uniteti i të gjitha forcave politike në kërkesa të përafërta ndaj Amerikës, gjë që Kosovës i mungon shumë. Sidomos, janë brengosëse qëndrimet e një pjese të opozitës të cilët, me shpresë se Amerika mund t’i kthejë në pushtet, ofrojnë koncesione ndaj Serbisë në dëm të shtetit për ta bërë zgjidhjen e problemit me Serbinë më të lehtë për ndërkombëtarët. Ky është një gabim i madh të cilin e kupton dhe e ndëshkon populli i Kosovës”.

Ndër të tjera, Aliçkaj tha se Kosova duhet të jetë e para për të gjithë liderët dhe politikanët tjera dhe në këtë mënyrë do kenë përparësi edhe tek Trump.

“Populli është i vetmi faktor që duhet dhe mund të ja japë dikujt pushtetin. Interesi i shtetit të Kosovës dhe kombit shqiptar është para çdo interesi tjetër. Presidenti Trump, më shumë se çdokush e kupton përkrahjen dhe forcën e popullit. Parulla e tij kryesore është “Amerika e para”. Edhe për liderët dhe politikanët e Kosovës, Kosova duhet të jetë e para. Kjo është një përparësi për të bashkëpunuar me presidentin Trump i cili është shumë i vendosur për të kryer punë”, përfundoi Agim Aliçkaj për “Bota sot”.