Kryeziu: Asnjë kryeministër shqiptar s’ka nevojë të jetë i varur prej pakicave kombëtare

Ish-nënkryetari i Gjykatës Kushtetuese, Kadari Kryeziu vlerëson se kryeministri në detyrë, Albin Kurti nuk është dashur të realizojë takime me partitë e minoriteteve joserbe për ta formuar qeverinë.

Sipas tij, Kurti ka qenë dashur të diskutojë me partitë opozitare, në mënyrë të bëhet formimi i qeverisë së re.

“Kurti ka zgjedhur këtë mënyrë. I forcon formimin e kërkesave të minoriteteve, jo atë që duhet. Nuk është veprim i mirë, sipas meje. Është dashur të diskojë me partitë e mëdha shqiptare, m’i lënë anash aspektin e fushatës – me tregua një emancipim kombëtar, shoqëror edhe shtetëror për të ardhmen për një Kosovë më të mirë. Kjo bëhet shumë lehtë, vetëm duhet që interesat kombëtare dhe shtetërore me dalë para interesave partiake dhe personale dhe m’i eleminu këto elemente negative”, tha ai në emisionin “Këndi i Debatit”.

Kryeziu konfirmoi që Kosova është në një situatë, ku interesat partiake të partive politike janë më të rëndësishme se ato shtetërore.

Ai vlerëson se asnjë kryeministër shqiptar s’ka nevojë të jetë i varur prej pakicave kombëtare. Për Kryeziun, partitë e minoriteteve joserbe nuk duhen me qenë pjesë e vendimtares.

“(Jemi në një situatë që interesat partiake janë më të rëndësishme se apo shtetërore?) Po, derisa bëhen kësi makinacione, po! Sepse, nuk ka nevojë të jetë i varur asnjë kryeministër shqiptar prej pakicave kombëtare. Ato janë pjesë konstituive, pjesë integrale e popullit tonë, por nuk duhet me qenë pjesë e vendimtares. Është dashtë me ngritë pak vetëdijen kombëtare e shtetërore dhe me pas një kulturë të lartë politike dhe emancipim. Kështu, nuk do të kishim problem”, deklaroi ai.

Kryeministri në detyrë, ka nisur të realizojë takime me partitë e komuniteteve me të cilët ka diskutuar rreth formimit të qeverisë së re.