Jamie Shea: Nuk ka asnjë arsye që forcat amerikane të tërhiqen nga Evropa

Shea ka vlerësuar se ditëve të fundit është rikonfirmuar përkushtimi i Shteteve të Bashkuara për Aleancën, tek ka theksuar se nuk sheh asnjë arsye për tërheqjen e përmendur së fundi të forcave amerikane nga Evropa e rrjedhimisht edhe nga Kosova. Këtë qëndrim Shea e shprehu në një intervistë në “Interaktiv” të KTV-së
Ish-zëdhënësi i NATO-s gjatë luftës në Kosovë, Jamie Shea, ka thënë se nuk ka asnjë arsye që forcat amerikane të tërhiqen nga Evropa.

Tek ka elaboruar mbi këtë mundësi që është përmendur javën e shkuar, Shea në një intervistë për “Interaktiv” të KTV-së ka thënë se presidenti amerikan, Donald Trump, ka për qëllim që aleatët evropianë t’i shtyjë të investojnë më shumë në mbrojtje, porse nuk e planifikon largimin e trupave.

Ai ka folur edhe për qasjen që Kosova duhet ta ketë në raport me administratën e re në Uashington dhe për përfitimet që mund të nxirren nga marrëdhëniet bilaterale Kosovë-SHBA.

Koha: Zoti Shea, si gjithnjë kënaqësi t’ju kemi në emisionin tonë!

Jamie Shea: Kënaqësia është e imja që jam me ju! Ju faleminderit për ftesën!

Koha: Le të fillojmë me vizitën e fundit që kemi parë të sekretarit të përgjithshëm të NATO-s, Mark Rutte, i cili vizitoi Bosnjën dhe tani po viziton edhe Kosovën. Çfarë mendoni rreth kësaj vizite: A është një vizitë e zakonshme apo po ndodh për shkak të tensioneve që po shohim në kontinentin e vjetër? Cili është qëndrimi juaj për këtë?

Jamie Shea: Pa dyshim, mendoj se në rastin e Bosnjës vizita po vjen për shkak të tensioneve të ditëve të fundit me vendimin e Gjykatës në Sarajevë kundër presidentit të Republikës Serbe në Bosnjë, Milorad Dodik, për sjellje antikushtetuese. Dodiku tani ka refuzuar të bashkëpunojë me institucionet federale boshnjake. Pra, ka një krizë atje. Dhe megjithëse NATO-ja nuk është më përgjegjëse për operacionin paqeruajtës në terren, pasi kjo është përgjegjësi e Bashkimit Evropian, mendoj se është shumë e dobishme që sekretari i përgjithshëm i NATO-s të shkojë në Bosnjë dhe të tregojë mbështetjen e tij për autoritetet kushtetuese, për përfaqësuesin e lartë dhe, natyrisht, për të qëndruar brenda Marrëveshjes së paqes së Dejtonit.

E dini gjithashtu se, me gjithë faktin se të gjithë po fokusohen kaq shumë te Rusia dhe Ukraina dhe lufta atje për momentin, ka çështje të tjera në Evropë, dhe NATO-ja ka një përgjegjësi të madhe për Ballkanin. Mendoj se është jashtëzakonisht e rëndësishme që Mark Rutte po tregon gjithashtu se ka kohë dhe vëmendje edhe për Ballkanin.

Natyrisht, Kosova nuk është në një situatë krize, por NATO-ja ka përgjegjësinë për ruajtjen e paqes në Kosovë, me KFOR-in. Prandaj mendoj se është shumë, shumë mirë që ai ka udhëtuar edhe në Prishtinë, në këtë ekspeditë në rajonin e Ballkanit.

Koha: Le të flasim edhe pak për Bosnjën. Para së gjithash, shefi i NATO-s në Sarajevë tha se tani nuk është viti 1992 dhe se NATO-ja nuk do të lejojë një vakum sigurie. A është ky një kërcënim diplomatik ndaj entitetit të Republikës Serbe për shkak të lëvizjeve separatiste që kemi parë së fundmi nga ta?

Jamie Shea: Mendoj se është kështu, sepse Dodiku ka vite që po shtyn drejt ndarjes dhe sigurisht tani me vendimin e Gjykatës, ai po e përdor këtë edhe një herë si një levë për të refuzuar bashkëpunimin me autoritetet federale dhe për të sfiduar autoritetin e përfaqësuesit të lartë, natyrisht, i cili emërohet nga BE-ja dhe Kombet e Bashkuara.

Siç e përmenda, BE-ja ka përgjegjësinë me operacionin e zonës në terren për ruajtjen e paqes në Bosnjë, kjo përgjegjësi ka qenë e NATO-s, natyrisht pas Marrëveshjes së Paqes së Dejtonit më 1995, por BE-së iu dha më 2004 kjo përgjegjësi.

Megjithatë, NATO-ja ka një histori të gjatë raporti me Bosnjën. Bosnja si vend kandidat për anëtarësim në NATO është pjesë e planit të veprimit të anëtarësimit në NATO. Pra, sigurisht, ju e dini se NATO-ja ka përgjegjësi gjithashtu. Ky është momenti kur mendoj se autoritetet në Sarajevë duhet të shohin se kanë një përkrahje ndërkombëtare dhe Dodiku duhet të shohë se ai është i izoluar dhe se komuniteti ndërkombëtar nuk po e pranon atë që ai po bën. Është një vizitë simbolike në këtë aspekt, por një vizitë shumë e rëndësishme politike, por edhe simbolike në kohën e tanishme.

Koha: Për më shumë se tre vjet, qëkur Rusia nisi pushtimin në Ukrainë, ekzistonte frika e shtrirjes së konfliktit në rajone të tjera dhe Ballkani përmendej si një pikë e brishtë sigurie. Cili është këndvështrimi juaj për rrethanat aktuale kur ne shohim administratën Trump që kërkon të ketë më pak angazhim në aranzhimet e sigurisë në kontinentin e vjetër?

Jamie Shea: Epo, në të vërtetë, është një shqetësim për evropianët dhe ju keni parë së fundmi një numër samitesh të BE-së dhe gjithashtu samite më të gjera evropiane, që përfshijnë Mbretërinë e Bashkuar, Kanadanë, Turqinë, Norvegjinë, si dhe BE-në, të cilat kanë parë se çfarë mund të bëjnë evropianët për të siguruar forcën e tyre paqeruajtëse në Ukrainë në të ardhmen, pasi të ketë një armëpushim dhe të marrë më shumë përgjegjësi evropiane për mbrojtjen në kontinent.

Por, nga ana tjetër, është e rëndësishme që të mbahen amerikanët të përfshirë. Është e rëndësishme të mbahet NATO-ja si një aleancë transatlantike, dhe sigurisht amerikanët kanë ende një përgjegjësi të madhe në Ballkan. Ata janë ende duke marrë pjesë në misionin e KFOR-it në Kosovë, kanë qenë një pjesë shumë e rëndësishme e tij, dhe sigurisht amerikanët, të paktën në administratën e mëparshme, kanë luajtur një rol të madh përkrah BE-së në lehtësimin e dialogut Prishtinë-Beograd. Unë mendoj se ne nuk e dimë se çfarë do të bëjë Trumpi, por duam t’i mbajmë amerikanët të angazhuar jo vetëm për Ukrainën, por edhe për sigurinë e Ballkanit.

Dhe sigurisht, kur Trumpi ishte president në mandatin e kaluar të tij, ai organizoi këtë takim në Uashington ndërmjet liderëve të Kosovës dhe Serbisë në përpjekje për të shtyrë përpara procesin e paqes.

Ai dëshiron të mbahet mend si një paqebërës, kështu që kjo mund të nënkuptojë se gjithashtu do të përpiqet të bëjë diçka për të normalizuar situatën midis Beogradit dhe Prishtinës gjithashtu. Duhet të presim dhe të shohim, por për aq kohë sa mund t’i mbajmë amerikanët, ne kemi nevojë për ta.

Koha: Por jam i sigurt që ju keni parë që njerëzit e afërt me Trumpin madje bëjnë thirrje që Amerika të largohet nga NATO-ja, dhe ne e kemi parë se pa dyshim ka një çarje në marrëdhëniet e Shteteve të Bashkuara me Bashkimin Evropian, me partnerët kryesorë që prej dekadash kanë bashkëpunuar në sektorin e sigurisë. Sa jeni i shqetësuar pasi që njerëz që qëndrojnë afër vendimmarrjes së Trumpit, kërkojnë që Shtetet e Bashkuara të largohen nga NATO-ja?

Jamie Shea: Unë ende besoj sinqerisht se kjo është një pikëpamje e pakicës që e rrethon presidentin Trump, dhe sigurisht një pakicë në Kongres. Anëtarët e Kongresit, në fakt, miratuan legjislacionin që e bën të pamundur tërheqjen e presidentit të Shteteve të Bashkuara nga NATO pa pëlqimin e Senatit. Dhe çfarë kemi parë ditët e fundit për shembull nga Marco Rubio, sekretari i Shtetit apo Matthew Whittaker, ambasadori i ri i SHBA-së në NATO, është një riafirmim i përkushtimit amerikan ndaj NATO-s. Asnjë qëllim për të tërhequr forcat amerikane nga Evropa. Ajo që Trump duket se dëshiron, është që evropianët të bëjnë më shumë në NATO duke shpenzuar objektivin aktual të NATO-s prej 2% të Bruto Prodhimit të Brendshëm për mbrojtjen e mbase do të shkojë përtej 3 për qind, duke pasur parasysh situatën më të vështirë të sigurisë.

Po, ka nga ata që e duan SHBA-në jashtë NATO-s, por ata zëra izolues kanë ekzistuar gjithnjë që nga krijimi i NATO-s, por unë ende mendoj është një pakicë dhe vija e Trumpit është se ai nuk dëshiron të heqë qafe NATO-n, por ai dëshiron ta bëjë atë më të fortë dhe dëshiron ta bëjë atë më të fortë duke pasur një ribalancim ku evropianët, natyrisht, bëjnë më shumë për të mbrojtur kontinentin e tyre.

Mendoj se kjo është porosi që evropianët tani e pranojnë, siç e kemi parë nga shumë vende, njoftimin për rritje të shpenzimeve të mbrojtjes dhe më shumë prodhim industrial të mbrojtjes. Por mendoj se Shtetet e Bashkuara do të mbeten të angazhuara në Evropë, dhe kjo përfshin edhe Kosovën dhe Ballkanin Perëndimor gjithashtu.

Koha: Sa e brishtë është situata, veçanërisht në Ballkanin Perëndimor, kur shikon në baza ditore lajme se mund të kemi një reduktim të trupave amerikane dhe në fakt shohim edhe zyrtarë nga Evropa që përmendin një gjë të tillë. Sa e bën të brishtë sigurinë nëse ushtarët amerikanë e lënë rajonin tonë?

Jamie Shea: Epo, unë mendoj se realiteti është se sot ka shumë më pak trupa amerikane në Evropë sesa gjatë Luftës së Ftohtë, kur ato kishin 320,000. Sot, kjo shifër është 100,000. Pra, NATO-ja është shumë më pak barrë për Shtetet e Bashkuara sot sesa ishte gjatë Luftës së Ftohtë.

Pjesa më e madhe e forcave që mbrojnë Poloninë, Shtetet Baltike, Finlandën, Suedinë, krahun lindor të NATO-s, dhe kjo përfshin gjithashtu Rumaninë, Bullgarinë janë forca evropiane të komanduara nga Britania e Madhe, Gjermania, Franca, Italia e kështu me radhë. Kështu që unë mendoj se realiteti është se evropianët po luajnë një rol shumë më të madh në siguri. Dhe sigurisht, nëse shikoni se KFOR-i komandohet nga Turqia, është kryesisht një forcë e përbërë nga evropianë. BE-ja tani po bën paqeruajtjen në Bosnjë.

Pra, Shtetet e Bashkuara nuk po përballen me një barrë të madhe dhe të shtrenjtë duke qëndruar në KFOR, por prania e vazhdueshme e Shteteve të Bashkuara, natyrisht, është shumë e rëndësishme politikisht dhe e di se trupat amerikane në KFOR e mbajnë Kosovën në ekranin e radarit të Shtëpisë së Bardhë, veçanërisht kur është fjala, siç thashë në bisedimet mes Kosovës dhe Serbisë. Kështu që unë mendoj se është shumë e rëndësishme të përpiqemi t’i mbajmë ata atje. Ndoshta evropianët do të duhet të paguajnë më shumë që trupat amerikane të qëndrojnë në Evropë. Tashmë Polonia ka bërë një ofertë për ta bërë këtë në të ardhmen. Presidenti Trump është një president transaksional dhe i pëlqen të shohë që paratë po shkojnë në Shtetet e Bashkuara, siç shkojnë paratë amerikane në Evropë.

Por prapë po them, ndjenja ime është se SHBA-ja do ta shohë që të mbetet një fuqi e madhe gjeopolitike, për ta bërë Amerikën përsëri të madhe, do të thotë të ruash aleancën me evropianët. Dhe mos harroni se ishte kur presidenti Trump ishte për herë të fundit në Shtëpinë e Bardhë, Maqedonia e Veriut iu bashkua NATO-s si anëtari më i fundit. Pra, ekziston ky lloj modeli i Shteteve të Bashkuara.

Koha: Por zoti Shea, mandati i parë i Trumpit dhe mandati aktual duket se ndryshojnë paksa nëse shikojmë vendimmarrjen dhe vrullin e vendimeve të marra në Uashington këto ditë. Ju përmendët për Radion Evropa e Lirë së fundmi se presidenti Trump është transaksional, gjë që sapo përmendët në intervistën pak më parë dhe se Kosova duhet të përgatitet. Çfarë në të vërtetë mendoni me këtë? Çfarë përgatitje duhet të kemi këtu në Prishtinë?

Jamie Shea: Epo ju e dini që presidenti Trump i sheh gjërat shumë si një biznes. Ju keni parë me Ukrainën, për shembull, se ai ka negociuar një marrëveshje për mineralet me presidentin Zelensky dhe se ky e sheh atë marrëveshje si të rëndësishme për sa u përket garancive amerikane të sigurisë për Ukrainën. Kështu që, ndjenja ime është se do të ishte mirë për Kosovën, megjithëse për të parë se çfarë lloj marrëveshjesh mund të bëjë me investimet e biznesit amerikan, për shembull, sipërmarrjet e përbashkëta në një prani civile në infrastrukturë e miniera, pasi Kosova ka shumë resurse natyrore.

Pra, ndjenja ime është se Kosova e renditur në Shtetet e Bashkuara mund të lidhet me biznesin komercial, sa më shumë që presidenti Trump do të shohë një avantazh për të ruajtur edhe marrëdhëniet e sigurisë.

Kur fola për Radion Evropa e Lirë, thjesht po thosha se, siç e kemi ne atë qasje nga presidenti Trump për të lidhur tregtinë e tarifave, investimet e biznesit për qasje në treg për sigurinë, çdo gjë që Kosova mund të bëjë për të operuar në atë front ndoshta do të ishte një përdorim i mirë. Por, duke e thënë këtë, ju e dini se shpresa ime është që pavarësisht shumë përpjekjeve gjatë viteve, përfshirë këtu edhe nga Donald Rumsfeld në administratën e Bushit disa vjet më parë për të tërhequr forcat amerikane nga Kosova në fund të ditës, NATO ka deklaruar se është e rëndësishme që amerikanët të qëndrojnë dhe ata gjithmonë kanë pranuar ta bëjnë këtë. Jam i sigurt që kur Mark Rutte të shkojë në Uashington do ta bëjë këtë veçanërisht, sapo ka qenë në Bosnjë dhe Kosovë, ai do të vazhdojë t’ia paraqesë këtë rast administratës Trump.

Koha: Për të vazhduar atë që sapo thatë, çfarë do të thoshte prania e NATO-s këtu në Kosovë pa çizmet amerikane në tokë?

Jamie Shea: Epo, unë jam që evropianët mund të ofrojnë forca të mjaftueshme, ata ofrojnë, ju e dini, pjesën më të madhe të forcave në Kosovë aktualisht. Turqia e Italia kanë komanduar KFOR-in dhe shumë vende të tjera të NATO-s marrin pjesë edhe për sa i përket situatës së sigurisë.

Jam i sigurt se evropianët mund ta bëjnë këtë punë. Por, siç e dimë të gjithë, prania e amerikanëve atje, qoftë edhe në numër të vogël, jep një sinjal politik shumë të rëndësishëm të vendosmërisë së NATO-s për të mbrojtur sovranitetin, sigurinë e Kosovës, dërgon një mesazh shumë të rëndësishëm parandalues ​​për ngatërrestarët dhe agresorët e mundshëm. Dhe thashë një moment më parë, të kesh një forcë të vogël amerikane në KFOR e mban edhe Kosovën në ekranin e radarit politik në Shtëpinë e Bardhë, sepse nëse Amerika ka trupa diku, do të interesohet për një diplomaci dhe stabilitetin e rajonit.

Unë mendoj se kjo është diçka, siç e pamë në të kaluarën, ju e dini, me të dërguarit specialë amerikanë në rajon, Kosova do të përfitojë nga kjo për aq kohë sa është e mundur të mbajmë prezencën që na nevojitet për të argumentuar në Uashington se është një investim i mirë i kohës dhe parave të forcave amerikane.

Koha: Siç pamë qëndrimet nga sekretari Rubio në lidhje me Bosnjë-Hercegovinën, ai doli kundër atyre që rrezikojnë sovranitetin dhe integritetin territorial të Bosnjës. A është ky një sinjal se Shtetet e Bashkuara nuk do të kenë një kthesë drastike në politikën e tyre ndaj Ballkanit, siç e kemi parë ndryshimin e politikës amerikane ndaj kontinentin evropian në përgjithësi.

Jamie Shea: Besoj se ishte një deklaratë e shkëlqyer nga Marco Rubio dhe tregon se megjithëse e dini që po shikojmë kaq shumë ndryshimin e politikës amerikane për momentin dhe aspektet përçarëse, ka gjithashtu një ndjenjë të mirë vazhdimësie, veçanërisht nga dikush si Marko Rubio, i cili është një internacionalist që është pro Evropës, pro NATO-s, dikush që ishte në të kaluarën një mbështetës edhe i ndihmës për Ukrainën. Unë jam i sigurt se për aq kohë sa Marco Rubio është në gjendje të drejtojë diplomacinë amerikane dhe shpresoj se do të ketë një dorë të lirë për të drejtuar diplomacinë amerikane, do ta shohim atë shkallë vazhdimësie.

Mendoj se ky ishte një mesazh i rëndësishëm sigurie dhe se Kosova mund të marrë zemër edhe nga kjo. Por përsëri, duke e bërë rastin në Uashington duke qenë aktiv dhe të mosqenit pasiv do të jetë i rëndësishëm, veçanërisht kur tani zgjedhjet u kryen dhe kemi rezultatet e zgjedhjeve në Kosovë. Do të kemi një qeveri të re shumë shpejt dhe shpresoj se pasi të formohet qeveria e re që do t’i afrohet Trumpit për të folur me të. Angazhimi me të, kjo është shumë e rëndësishme dhe shpresoj se do të jetë prioritet për kryeministrin Kurti.

Koha: Zoti Shea, siç po e shohim tani, me z. Rute, që është në Prishtinë, Kosova do të vazhdojë të shprehë historinë e saj të gjatë të aspiratave që kishte për t’u anëtarësuar në NATO. Në rrethanat e tanishme, cilat janë gjasat e Kosovës për t’iu bashkëngjitur NATO-s, duke parë që administrata e re amerikane është kundër idesë që Ukraina t’i bashkëngjitet asaj, ndonëse aty natyrisht ka një kontekst dhe situatë tjetër ku gjendet Kievi zyrtar. Cila është perspektiva e Kosovës për të thyer më në fund këtë raport të akullt që e ka me NATO-n qe sa vjet?

Jamie Shea: Epo, po. Dua të them pa dyshim që ne ende e kemi këtë çështje diplomatike të njohjes dhe jam personi i parë që pendohem që nuk kemi arritur ta kapërcejmë këtë gjë në vitet e fundit, por besoj se do të tejkalohet në të ardhmen. Unë mbështes anëtarësimin e Kosovës në NATO, por nuk do të ndodhë kjo gjë brenda javësh nëse jemi të sinqertë.

Unë jam dakord me ju dhe mendoj se Ukraina për administratën e Trumpit është në një tjetër raport, për shkak të marrëdhënieve të vështira me Rusinë dhe sigurisht vështirësia për të dhënë garanci amerikane të sigurisë për Ukrainën.

Mendoj se Ukraina është në një kategori të ndryshme nga vendet e Ballkanit Perëndimor dhe, siç thashë më herët, megjithatë mos harroni se kur Trumpi ishte për herë të fundit në Shtëpinë e Bardhë, një vend i Ballkanit Perëndimor, fqinj juaji, Maqedonia e Veriut, u anëtarësua në NATO.

Kështu që Trumpi ka qenë në rekord për sa i përket zgjerimit të Aleancës dhe natyrisht rreziqet për NATO-n dhe për Shtetet e Bashkuara për ta sjellë Kosovën në Aleancën e NATO-s janë shumë më të vogla sesa për ta anëtarësuar Ukrainën. Ajo që shpresoj është se NATO-ja dhe Kosova do të punojnë në një marrëveshje partneriteti që do të intensifikojë shkallën e bashkëpunimit praktik dhe ndërveprueshmërisë në mënyrë që Kosova dhe NATO-ja të vazhdojnë të punojnë në drejtim të anëtarësimit eventual.

Koha: A e shihni se kjo mund të ndodhë në të ardhmen e afërt dhe çfarë vrulli do të sillte që kjo aspiratë e vazhdueshme e Kosovës për t’u anëtarësuar në Traktatin Atlantikoverior të ndodhë?

Jamie Shea: Epo, Kosova është një vend pro Amerikan. Të gjithë e dimë se është vend pro NATO-s. Kjo i ka ndihmuar amerikanët në shumë mënyra, veçanërisht në luftën kundër terrorizmit, partneriteti ka qenë i ngushtë.

Trumpi ka qenë i interesuar për Kosovën, siç e thashë, nga aktivitetet e tij të mëparshme paqeruajtëse në mandatin e tij të mëparshëm në Shtëpinë e Bardhë dhe për këtë arsye mendoj se anëtarësimi i Kosovës në NATO nuk do t’i shkaktonte NATO-s shumë probleme gjeostrategjike.

Kështu që, nuk e di sa kohë do të zgjasë. Unë nuk jam një fallxhor, por gjëja kryesore është drejtimi i udhëtimit. Nëse jeni në rrugën e drejtë, ju do të arrini në destinacion dhe kështu do të intensifikoni partneritetin. Të kemi aktivitete të reja, stërvitje të përbashkëta, ndërveprueshmëri, përfshirje më të madhe të Kosovës në institucionet e NATO-s, këto janë gjërat që duhet t’i shikojmë në të ardhmen e afërt.

Koha: Jam i sigurt që e keni parë se Forcat e Sigurisë së Kosovës janë në një fazë transformative. Po investohet në sisteme mbrojtëse nga Shtetet e Bashkuara dhe vende të tjera të NATO-s. A mendoni se pavarësisht prezencës së NATO-s duhet të vazhdohet me investime në armatim në këtë kohë të vështirë, kur të gjitha kombet po investojnë më shumë në mbrojtje. Çfarë qëndrimi keni ju për këtë?

Jamie Shea: Mendoj se është e rëndësishme për Kosovën që të bëjë përpjekje për vetëmbrojtje, sepse vetëmbështetja në NATO është shumë e rëndësishme. Kosova duhet ta bëjë këtë në një dialog me NATO-n. Pra, i shpenzon paratë për gjëra të duhura dhe nuk i harxhon paratë për gjëra që nuk i duhen. Dhe sigurisht, përderisa KFOR-i është në Kosovë, kjo gjithmonë do t’ia sigurojë Kosovës formën më të mirë të mbrojtjes dhe parandalimin.

Mendimi im është se po, Kosova duhet të investojë, por të investojë në llojin e gjërave që ia mundësojnë Kosovës të përballet me llojet e situatave, veçanërisht nga siguria kufitare, lufta kundër krimit të organizuar, përballja me krizat mjedisore, situatat humanitare në rast të fatkeqësive natyrore e këto lloj gjërash. Kështu që shpenzoni paratë tuaja me mençuri. Sepse sigurisht, nëse nuk ka vetëm mbrojtje, ka edhe zhvillim të vendit, arsim, shëndetësi, të gjitha këto gjëra janë të rëndësishme gjithashtu. Mbrojtja duhet të balancohet me këto konsiderata të tjera. Mos shpenzoni para vetëm për ta kënaqur NATO-n. Por, shpenzoni para për gjërat që kanë kuptim për nevojat e mbrojtjes së Kosovës.

Koha: Pyetja ime ka të bëjë me mendimin tuaj për rrezikun më eminent të sigurisë për rajonin tonë dhe veçanërisht për Kosovën. Si i kuptoni ju porositë luftënxitëse që shohim. P.sh mbrëmë presidenti i Serbisë Aleksandër Vucic ka thënë se siguria në regjion është shumë e brisht. Po ashtu shohim edhe në Prishtinë liderët që kanë folur herë pas herë se mund të ketë një luftë. Cilin e shihni ju rrezikun kryesor për sovranitetin e Kosovës?

Jamie Shea: Paj, unë shpresoj se si në Prishtinë e si në Beograd do ta ulin retorikën luftënxitëse. Ne kemi pasur bisedime mes Kurti dhe Vuciqit në të kaluarën, veçanërisht në Ohër, 2 vjet më parë në Maqedoninë e Veriut. Shumë punë është bërë për normalizimin e raporteve.

Do të ketë një qeveri të re në Prishtinë. Ka një vështirësi më të madhe në Beograd, sepse i bënë këto protestat e mëdha që shkaktuan edhe dorëheqje në qeverinë atje dhe situata është e paqëndrueshme. Por, unë them se duhet të rikthehen bisedimet në binarë për normalizimin e marrëdhënieve dhe të ulet toni i retorikës e të përqendrohemi më shumë në substancë.

Kosovarët janë të mbrojtur nga KFOR-i dhe nga Forcat e Sigurisë së Kosovës dhe këto janë garancitë që u duhen kosovarëve në këto kohë.

Koha: Zoti Jamie Shea, si gjithnjë, ishte kënaqësi e madhe t’ ju kishim në programin tonë.

Jamie Shea: Faleminderit shumë për ftesën dhe fat me vizitën e sekretarit të përgjithshëm të NATO-s.