Kurti: Qeveria është e përkushtuar për t’i zbardhur zhdukjet me dhunë gjatë luftës

Kurti: Qeveria është e përkushtuar për t’i zbardhur zhdukjet me dhunë gjatë luftës

Në 24-vjetorin e zhdukjes me forcë të Albion Kumnovës dhe pesë burrave të tjerë nga Gjakova, kryeministri i Kosovës, Albin Kurti, vizitoi familjen Kumnova.

Në Gjakovë, Kurti u prit nga Nestrete Kumnova, udhëheqëse e shoqatës “Thirrjet e nënave”, bëhet e ditur në një komunikatë për media.

Në dhomën e mbushur plot me kujtime të të birit ende të zhdukur, nëna Nesrete kujtoi marsin e 1999, kur një javë pasi NATO filloi sulmet ajrore kundër Serbisë, Albioni, në atë kohë 21 vjeç, u mor nga shtëpia e tij, së bashku me pesë të afërm të tjerë civilë. Në prill 2011, eshtrat e personave që u morën bashkë me Albionin u gjetën në Batajnicë pranë Beogradit, dhe u rivarrosën në Gjakovë.

Bëhet e ditur se kryeministri Kurti ritheksoi se qeveria është e përkushtuar për të zbardhur zhdukjet me dhunë gjatë luftës dhe për të mos reshtur së kërkuari drejtësi për të gjitha krimet e luftës në Kosovë.

Në këtë vizitë, kryeministri Kurti shoqërohej nga ministrja e Arsimit, Shkencës, Teknologjisë dhe Inovacionit, Arbërie Nagavci dhe kryetari i Komisionit Qeveritar për Personat e Zhdukur, Andin Hoti.