AAK mbështet propozimin evropian për marrëveshjen Kosovë-Serbi
Aleanca për Ardhmërinë e Kosovës (AAK) e mbështet propozimin evropian lidhur me dialogun Kosovë-Serbi.
Me një komunikatë për media, AAK deklaron se qëndrimi i Aleancës për propozimin evropian të mbështetur fuqishëm nga SHBA, për marrëveshjen e normalizimit të marrëdhënieve me Serbinë, për dallim prej të tjerëve, ka qenë konsistent e në mbështetje të plotë.
“Pa asnjë mëdyshje e kemi vlerësuar se është një marrëveshje që brenda vetes ka njohjen “defakto” të shtetit të Kosovës dhe që është interes naconal i yni!”, deklaron kjo parti opozitare.
AAK rikujton se si forcë politike, i ka dhënë mbështetje këtij projekti pa kurrfarë kalkulimi partiak apo elektoral.
“Prandaj përpjekja e disa individëve, apo grupimeve të caktuara që këtë qëndrim të interesit nacional e shtetëror të Aleancës, ta vendosin në mozaikun e shkurtpamësisë së tyre, s’është gjë tjetër përpos mjerimi i tyre!”.
Aleanca thekson se kjo parti dhe gjithë forcat progresive ne Kosovë, sot janë rreshtuar me ShBA dhe vendet e BE-së, në procesin e përmbylljes së marrëveshjes me Serbinë.
“Rrugës së çlirimit, të lirisë dhe ndërtimit të shtetit të Kosovës, i kemi kemi hyrë bashkërisht me partnerët tanë në krye me ShBA, dhe bashkërisht do ta përfundojmë!”.
